[الكوكني ابو مافيش]

المشاركة الأصلية كتبت بواسطة أبو عامر اليافعي

والله ياكوكني اول ماشفت العنوان دخلت حامي اريد انتف شواربك .
كيف تقول ان واحد عدني دلق يافعي ونحن قبائل حديد يقرط حديد وانتم مالكم بالقبيلة وحابين المدنية والانفتاح على العالم لما جاء فتح مدينتكم عمك علي والان تحملوا الفتوحات الاسلامية طالما وانتم تحبون تنفتحوا وحتى السجن حقكم اسمه الفتح .
ايش حكاية الفتح والانفتاح والفتوحات مخيمة عليكم .
المهم قرات الموضوع وعرفت ان القصة كلها فرة وهربة وقلت الحمد لله وهدات شوي وانا اتابع الردود حصلت واحد يافعي ينخط نخيط وانا ما اخفي عليك اخذتني الحمية اليافعية ونويت عليك الشر المستطير وقلت لنفسي يالله تابع الردود عشان يفتهم الخبر من راسه لارجوله وحصلت المدير العام يقول لاتكون عنصري يابو نخيط وانا استحيت لعاد يقولوا عنصري وبطلت اللي كنت ناوي عليه .
المهم ذلحين كيف نسوي بالدحابشة فرقونا وخلوا كل واحد يخاف من صاحبه وحتى ونحن بالخارج مانتصل ببعض لان كل واحد خايف يكون الثاني جاسوس عليه ولما حد يسالني انت انفصالي ولا وحدوي افكر شوي واقول والله لازم من المخارجة وبلاش زنط وانت تدور لك على بطنك ورزق عيالك وابعد عن الشر وغني له واجاوب اقول انا وحدوي واللي يسال يقول والله مانت جنوبي اصلي يمكن اصلك من بلاد ثانية اقول له انا يافعي يقول لي هاه عرفت الان انكم يقولوا ان اصلكم يهود ولازم نطهركم من الجنوب .
والان ياصاحبي ماحد يثق بالثاني والشكوك بالنفوس كبيرة مع انه نحن كلنا تحت عود اخضر ثقيل لكن للحين مافهمنا .
وانت تقول كله لعب كشاف وكيف بايكون الكشاف هذا وهذه الحالة .
وبعدين انت مالك والقيادات التاريخية للجنوب شوفك تدخل نفسك بدهاليز خطيرة لان اللي تكتبه فيه تحريض واضح عليهم وهم ماصدقوا يحصلوا مهرة بعد السكنة وانت جاي ذلحين تنكوش الكلام .
اعقل ولا با نجهز لك صميل اخضر على طول ظهرك .

حياك الله يا ابو عامر والله بيني وبينك شوفنا بلا شنبات احلقه أول باول لأنه بيني وبينك لو كانت تفيد الشنبات كان فادنا شنب هيثم قاسم في حرب أربعه وتسعين من يومها شوفنا حلقت شنبي وخليته ملط ومش انته دخلت حامي بيني وبينك وقده اللعب كشاف كل الأعضاء دخلو حامين وعاده تم تغيير العنوان لأننا حطيته عنوان قوي وفيه قليل عوجه بس ما افتهمش للجماعة واجت على راسي على قوله جنت على نفسها برااقش الي اتهمنا أننا كلب والي اتهمنا أننا افرق الصف والي والي وعينك ما تشوف غير عمك الكوكني يضحك وبيني وبينك القات اليوم بعشره الف ريال لاننا عارف انه بيقع يوم حامي الوطيس وانا عارف انكم قبائل وانتم اصل قبائل حم ير والنعم فيكم ما اقدر أقول في أصلكم شئ ومن حيث ان أصلكم يهود هذه ديانة كانت منتشرة في الجزيرة العربية وشوف قصه أصحاب الأخدود يقول تعالي ::: وَالسَّمَاءِ ذَاتِ الْبُرُوجِ (١) وَالْيَوْمِ الْمَوْعُودِ (٢) وَشَاهِدٍ وَمَشْهُودٍ (٣) قُتِلَ أَصْحَابُ الْأُخْدُودِ (٤) النَّارِ ذَاتِ الْوَقُودِ (٥) إِذْ هُمْ عَلَيْهَا قُعُودٌ (٦) وَهُمْ عَلَى مَا يَفْعَلُونَ بِالْمُؤْمِنِينَ شُهُودٌ (٧) وَمَا نَقَمُوا مِنْهُمْ إِلَّا أَنْ يُؤْمِنُوا بِاللَّهِ الْعَزِيزِ الْحَمِيدِ (٨) الَّذِي لَهُ مُلْكُ السَّمَاوَاتِ وَالْأَرْضِ وَاللَّهُ عَلَى كُلِّ شَيْءٍ شَهِيدٌ (٩) إِنَّ الَّذِينَ فَتَنُوا الْمُؤْمِنِينَ وَالْمُؤْمِنَاتِ ثُمَّ لَمْ يَتُوبُوا فَلَهُمْ عَذَابُ جَهَنَّمَ وَلَهُمْ عَذَابُ الْحَرِيقِ (١٠)
ففي الايه الكريمة تفسير لكونه كانت في جنوب الجزيرة العربية الديانة اليهودية وأصحاب الأخدود هم منا وفينا
بالنسبة لموضوع أننا في الخارج شوفنا في الداخل وما فيش مشكله اذا تشتي رقمي بكتبه لك هنا قدام الناس ما عنديش مشكله لكن انته بتتصل بي لأننا ما فيش معي ميزانيه اتصالات دوليه وبالنسبة لنا أصحاب عدن مساكين من فاتح لفاتح ربك يعينا بس لكن ان شاء الله هذا الواجي بالطريق قده أخر فتح لأننا ما نقدر على أكثر من كذا بنهاجر بعدها إلى الخارج وبنطلب لجو سياسي وبيني وبينك قده موضة الأيام هذه روح لك أوقف في المنصة في أي فعاليه او جمع عيال حافتكم وصلح فيهم خطاب وصوره فيديو وتكلم وسب للتوله قليل وبعدين سافر إلى خارج اليمن واطلب لجو سياسي بحكم انك كنت مناضل كبير وهب لهم صورك وبس انتبه خلي واحد يصورك مضبوط وخليه يكثر من الصور وقول لهم انك مستهدف ومطارد من الفاتح العظيم
والله شوف يا اخي شوف اللعب كشاف انته تقول قياده تاريخيه وبيني وبينك وبدون زعل اش من تاريخ بيني وبينك تاريخ جدتي احسن من تاريخهم سواء الشخصي او السياسي وبعدين هولاء عديمين الخبره ماتشوف كيف هم الان مشتتين وحالتهم بالتنك وبعدين هولا ما فيش معهم علاقات مع العالم بدون اصدقا او معرفه يعني خرجوهم الجماعة من الباب انتم بالحراك تدخلوهم من الطاقة بعدين انا مش قصدي أننا أحرض الله المستعان بيني وبينكم انا اكبر محرض لكن بالحق وانتم معاكم عقل يميز بين المعقول والغير معقول وكل واحد حر في عقله على قوله الاخوه في مصر الشقيقة كل واحد ينام على الجنب الي يريحه بعدين الكوكني واحد يعني اش هم بيخافو من الكوكني بالعكس انا خائف من القيادة التاريخية خايف اذا يرجعو للتاريخ ويصلحو بي مثل ما صلحو في تاريخهم القديم وبيني وبينك أحسن لهم يشوفو لهم شغله غير السياسة لأنهم ما يصلحو لحاجه او انا معي لكم حل يا ابناء الجنوب بتاخذون الحل من عمكم الكوكني بنفتح لكل سياسي قديم دكان مواد غذايه مش ذهب او ملابس على شان انا قدنا متأكد انه أخر ألسنه ما بتحصلون راس المال بيفلسون واذا نجحو وجابو مكسب نرجعهم ثاني مره ونقول صح هولاء قياده تاريخيه يالله جمعو تبرعات مليون ريال يمني وافتحوا ربعه دكاكين مواد غذائيه وسلموهم من بعد بكره وشوفو النتيجه ألسنه الجاية والحراك قده شغال لانهم لا يهشون ولا ينشون ماشي بيوقف الحراك على ضمانتي وشوف الجيل الشاب يقدر يتحمل المسئوليه شوف بهب لك مثال صغير الدكتور عدنان علي سالم البيض خرج من عدن بالملابس الي فوقه وألان معه شركه كبيره في الأمارات راس مالها بالملايين تعرف ليش نجح لانه شاب وخليه يفتهم لكم الموضوع خاص بالشهداء والجرحي لا احد يقول الكوكني شف او قال حاجه