[align=center]
((الجزء السادس))
(( في المستشفى ))
سعود بغرفة الطوارئ يضمدون جروحه البسيطه بعد ما خلص راح عند غرفة عبير ينتظر الدكتور وبتوتر
سعود في نفسه : ياربي انا السبب .. اذا صار أي شي لعبير ماراح اسامح نفسي..آآآه يا خلود كيف اطلعك من راسي كيف؟؟ ......يارب انك تعدي هالليله على خير
انتبه سعود للدكتور وهو طالع من غرفة عبير وراح له
سعود : هااا يا دكتور زوجتي فيها شي؟؟
الدكتور : لا الحمدلله زوجتك بخير .. بس كان مغمى عليها من الصدمه والحين حاطين عليها مغذي لمدة ساعه
سعود بأرتياح: الحمدلله لك يارب.. دكتور متأكد مافيها كسور؟؟ متأكد انها بخير؟؟ الله يخليك طمني
الدكتور : اهدأ زوجتك بخير ما فيها شي واذا مو مصدقني روح ادخل عليها
راح سعود ودخل على زوجته .. عبير على السرير وفي ايدها المغذي ..قرب منها سعود ومسك ايدها وايده الثانيه على راسها
سعود : حبيبتي وش اخبارك؟؟
عبير بتعب: الحمدلله بخير .. انت شلونك جاك شي؟
سعود : لا يا عمري انا بخير والحمدلله...سامحيني يا عبير انا آآسف
عبير : لا يهمك يا قلبي الحادث مكتوب لنا
قرب سعود وطبع بوسه على جبينها : الله لا يحرمني منك..اهم شي اني تطمنت عليك والحين اعذريني بروح اشوف وش صار على سيارتي.... اعذريني ياقلبي لازم اخلص كل شي مع الشرطه
ابتسمت له عبير : معذور يا حبيبي
طلع سعود برى الغرفه ورايح للأستقبال لأن هناك شرطي ينتظره ..وبعد نص ساعه خلص سعود اموره مع الشرطه ورجع لغرفة عبير الا يرن جوال سعود (( تهاني يتصل بك))
سعود : هلا تهاني
خلود : سعود انا خلود مو تهاني
سعود : آآآسف يا خلود نسيت ان الجوال عندك
خلود : انا اللي آسفه لأني دقيت عليك بهالوقت بس شفتك تأخرت ما جيت تاخذ الجوال فحبيت اتطمن
((سعود كل ماسمع طاري خلود او يسمع صوتها ينسى نفسه وينسى انه متزوج ومايذكر الا كلامها واعترافها يزن بأذانه))
سعود بكل رقه : تخافين علي يا خلود؟؟
خلود انصدمت من رد سعود : هاااااا لأ ...انا ...
وقفلت الخط بوجه سعود ...سعود يحاسب نفسه (( هو ليش قال كذا؟؟ ليش ينسى نفسه عند خلود؟؟ وحبه لعبير وين راح؟؟ ))تذكر عبير وراح لها بالغرفه وبعد نص ساعه طلعوا من المستشفى ووقفوا لهم تاكسي يوصلهم للبيت
*******************
(( غرفة خلود))
خلود منسدحه على سريرها وضامه المخده .. وتسأل نفسها : ليش سعود كلمني بهالطريقه؟؟يمكن عارف اني احبه؟؟ بس كيف ؟؟ لايكون حنان قالت لتهاني وتهاني قالت له؟؟ لا لا مااتوقع؟؟يمكن هو مغيزلجي او يمكن انا فهمت سؤاله غلط او ماسمعته زين..شغلت المسجل وسمعت اغنيه رابح صقر :
احب انا لا لا .. اشتاق لك لا لا .. لكني ميت فيك فاهمني ولا لأ.. دايم افكر فيك واشتاقلك واجيك...من قال انا ما ابيك لا تصدق اقواله .. احب انا حبك واذوب في قلبك يشهد علي ربك قلبي لك لحاله..اتوه واحلم بك هذا وانا جنبك وان زار جفني النوم زولك تهيأ له.. هذي حقيقة حب اخفيتها بالقلب ..خوفي من العذال تدري وتغتا له.......
(( اليوم الثاني الساعه خمس ونص الصباح))
خلود تسمع صوت الباب
خلود بكسل : ميييييييييين؟؟
..............: انا
خلود مو مصدقه قامت تفرك عيونها وتقرص بنفسها هي بعلم ولا بحلم ...لا لا اكيد بحلم ..قامت وفزت من على السرير وراحت تفتح الباب
خلود وهي فاتحه عيونها مو مصدقه : مهااااااا؟
مها مبتسمه : صباح الخير
خلود بدهشه : صباح النور
مها : انتي الى الحين ناايمه ؟؟ يالله صلي الفجر والبسي انا انتظرك تحت
راحت مها وخلود واااقفه عند باب غرفتها مو مصدقه وش قاعد يصير
خلود تكلم نفسها : مها تصحيني من النوم ولا بعد بتروح معي الجامعه؟؟؟لا لا اكيد نازل الوحي ..انا يبي لي اترووش بمووويه ثلج شكلي قاعده احلم والى الحين ما صحصحت
خلصت خلود وانزلت تحت بالصاله باست راس خالتها وابوها وقعدت..
مها : خلود قومي افطري بالجامعه تأخرنا
ام خالد وبو خالد صار حالهم من حال خلود مندهشين
ام خالد تكلم بو خالد بشويش : انت تشوف اللي انا اشوفه
بو خالد بدهشه : مااااني مصدق
خلود : يالله على قولتك نفطر بالجامعه
طلعت مها وخلود وركبوا السياره
*************
(( في الجامعه))
بعد ما فصخوا عباياتهم راحت خلود لمكانها المعتاد اللي تجتمع فيه هي وتهاني وحنان التفتت ورى ناحية مها
خلود : مها بتجين معي ولا بتروحين لصديقاتك؟؟
مها بأابتسامه : لا بجي معك
وهم ماشين جاتهم نهى واخذت مها على جنب وخلود قاعده تنتظر مها في الجهه الثانيه
نهى : مها وش قاعده تسوين مع خلود؟؟
مها : وش فيها يعني مايصير اروح واجي مع اختي
نهى بدهشه : لا عاادي ما فيها شي بس ...انتي حره ..المهم تعالي نفطر؟
مها : روحي افطري مع البنات انا بروح مع خلود
مشت مها وخلت نهى بوسط دهشتها...وصلوا مها وخلود عند تهاني وحنان
خلود ومها : السلام عليكم
تهاني وحنان وعيونهم مبققه: وعليكم السلام
خلود مدت الجوال لتهاني : خذي جوالك ومره ثانيه لا تنسينه
تهاني اخذت جوالها : مشكووره ..بس هاا لا يكون سولفتي مع حنان وخسرتيني
خلود : ههههههههه لا وش دعوى
حنان : مها وش اخبارك؟
مها بأابتسامه: الحمدلله انتوا وش اخباركم ؟؟ وشلون استعدادكم للأختبارات؟؟
حنان : الحمدلله بخير والله يعينا الاسبوع الجاي بتبدأ المذاكره صح
تهاني : ايه والله الله يعين
مها : وش رايكم نروح نفطر ؟
الكل : اوكي
مها تمشي قدام مع تهاني وتسولف وتضحك معاها وحنان وخلود وراهم
حنان بشويش : خلود انتي متأكده ان هذي اختك مها؟؟ اخاف انكم بدلتوها؟
خلود مبسوطه : تصدقين انا كنت مستغربه مثلك ..بس بعدين قلت الحمدلله اللي غيرها
حنان : مين يصدق ان مها تتغير ؟؟ اخاف انها تخطط على شي
خلود : لا حرام عليك لا تظلمينها
التفتت لهم مها مبتسمه..خلود وحنان ردوا لها الابتسامه وقدموا شوي وصاروا يمشون مع بعض..
***************
(( في بيت بو خالد الساعه 12 الظهر))
دخلت خلود ومها الصاله وكانت ام خالد وخالد وساره وتركي موجودين..طبعا الكل مو مستغربين لأن ام خالد قالت لهم السالفه
خلود ومها : السلام عليكم
الكل : وعليكم السلام
مها رمت نفسها على الكنبه : آآآآآآآآه تعبانه
خالد: تعبانه روحي نامي
مها : تصدقين يمى ..خلود لفت بي الجامعه خمس مرات تعبت من المشي وكل ما قلت لها نقعد تقول لأ المشي زين
ام خالد : يوم انكم لفيتوا الجامعه خمس مرات ليش رايحين اليوم قعدتوا بفرشكم احسن
خلود مازالت واقفه : خالتي احنا رايحين نشوف الاشياء الناقصه وان شاء الله بكره ماني رايحه
تركي بصراحه : واخيرا يا مها حنيتي على خلود
مها: ودي اقول لك مالك دخل بس بحترم وجود امي واخوي الكبير
تركي : لا لا انتي اكيد مو مها .. من متى وانتي تحترمين وجود امي وخالد؟؟
خلود : بالعكس يا تركي انت لو تشوف مها اليوم اندمجت مع حنان وتهاني بسرعه والبنات انبسطوا منها..موتتهم من الضحك
ساره بدهشه : مها تضحك؟؟غريبه .... واذا ضحكت تضحك مع نهى بس
مها قامت معصبه : يووووووووووه وبعدين معاكم كذاك مو عاجبكم وكذا مو عاجبكم وش تبوون
خلود وهي رايحه : عن اذنكم انا بروح غرفتي بغير ملابسي
خالد وهو قايم : وانا بروح ارتاح شوي قبل لأ روح الشركه
ام خالد : سوووويره قومي فوق ذاكري
ساره زعلانه : يمىىىى ما امداني اخذ استراحه تكفين مدديها لي ربع ساعه
تركي : تستاهل سااارونه استراحه الين بعد الغدا
ام خالد : والله كيفك النجاح لك مو لي
*********** [/align]
__________________
استخــــــدام اسلوب الشتم والقدح بالفاظ بذيئة تدل على إفـــــــلاسك في الحديث
انت تعرض صورة واضحـــة على شخصيتك النضـــاليةالتحررية اثناء حوارك
فالنســـاء تتكلم ثم تتنتقي الالفـــاظ بينما الرجال تنتقي الالفـــاظ ثم تتكلم
|