ماكل من يركب على الخيل خيال
ولا كل خيل تعجبك هي أصيــــــــله
ولا كل من يعجبك هرجه برجال
بعض البشر ملــــــــسون وايده بخيله
الرجل تثبت له أقاويل بافعال
لاقال شئ ونفذه هو دلـــــــــــــــــــــــــيله
والرجل لاشفته مع القيل والقال
ابعد عنه هذا صفاته عليــــــــــــــــــــــــله
و الكذب خله عنك مافاد لو طال
قول الصدق ياصاح غنم وجميــــــــله
وخلك شجاع وذي صفات للابطال
اللي كما سيوف تبارق سليـــــــله
واللي شراك اشريه لو كان بالمال
خلك معه وان مــــــال دور بديله
واصبر ترى الدنيا تبدل بها أحوال
وما كل شئ صافي تشـــــوفه تجي له
وبعد الكدر تشرب صفا عذب وزلال
هذا الزمن فيه استــــقامه وميله
وصاحب خليل لو جفا الوقت مامال
ترى الرجل يعرف بقيمة خليــــله
واقفل على سرك بكتمان واقفال
بعض العرب يسمع وينوي بحـــيله
وخلك أمين إذا توليت الأعمال
من خان في يوم الحشر يا حليــــله
خل التواضع فيك واضح بالافعال
ترى الكبر يردي بيوم وليــــــــــــــــله
ولا تحسد اللي عنده اموال وعيال
وش ينفعك لو كان حـــسدك يزيله
و لا تزور تقلب الزين بطـــــــــــــال
الله عليم بالنوايا الدخـــــــــــــــــيله
وخلك رزين ترى المخفه للاطفال
واصفح عن المخـــــطي ولو زاد قيله
واحمل همومك لو تزن وزن الاثقال
بكره تروح وتنجلي لو ثقـــــــــــــــيله
وزور الاقارب للرحم كون وصـــــال
وخلك عظيم الشان وسط القـــــبيله
وصلاة ربي عد ماهل همـــــــــــــال
على النبي اللي صفـــــاته جلــــيله
__________________
من يوقف البحر إن هاجت عواصفه *** من يحجب الشمس عن أفاق دنيانا
 |