بسم الله الرحمن الرحيم
(لكل حاجه ثمن )
قلنا لعفاش ما شيء كل حاجه بلاش
لكل حاجه ثمن يدفع عباره صحيحه
نهاية الغدر روحتك ليد الطهاش
لكل طاغي نهايه والنهايه قبيحه
نهايتك ياالمحنش يلدغوك الحناش
ربيت حنشان ما سويت حاجه مليحه
انت الذي جبت للشعب العمى والطراش
والفقر والجوع والأمراض والناس صيحه
ثلاثه اعقود ترقص فوقنا حاش باش
دوخت باالشعب والأم الحنون الجريحه
واليوم قدها طريحه ملقيه عاالفراش
بتنازع الموت يا ذي ما سمعت النصيحه
سلمتها عبدربه يوم قدها قشاش
ولعاد حصل ولا قطره بضرع المنيحه
ضاعت من ايدك وايده ما يفيد النقاش
قدها مع حسين بدر الدين داخل ضريحه
وبعض لحزاب تترادع مثيل الكباش
ولا حدا منهم شاف الطريق الصحيحه
والشعب لا أمن حصل بعدكم أو معاش
لعنه على شعب قالتها اللسان الفصيحه
واحد لعبدالملك يهتف وبيقول عاش
واخر لعفاش وإن ودع يغير شريحه
وعبدربه مكانه مثل ذي به عماش
ما عاد بيشوف قدامه وضيع سميحه
صنعاء لها الله تتوحم وفيها عشاش
حامل وصفوا لما تولد وشلوا ذبيحه
من بعد مقتل علي صالح لمه لرتباش
عبدالملك ما يخذ صنعاء بزامل وصيحه
ما دام عاد التحالف يمطروهم رشاش
شرار حمرا بتقذفهم وتقدح قديحه
يا شرعيه لو تبي صنعاء فصنعاء قداش
لو ما قدرتوا على تحرير صنعاء فضيحه
أما عدن مهرها جاهز ومدفوع كاش
من دم لحرار في أرض الجنوب الفسيحه
رجالها يفتدوها باالدماء والمشاش
بعزم وإصرار حتى باالضروف الشحيحه
والانتقالي يتوج نصرها باالطماش
والشعب معكم إذا توجد قياده صريحه
يحق له بعدها با يبترع با النماش
لا قد بناء دولته حسب العهود الصحيحه
خلاص قال القديمي يا الحليله كفاش
صلوا معيا على ذي ما نمل من مديحه
صلاة ما غرد البلبل وطار الفراش
على محمدرسول الله ذي المسك ريحه
الشاعر/////////
أحمدعبدالله قاسم محمد القديمي المفلحي
( ابو قاسم )
5/12 /2017
|