وربي قهر لما تحصل حد من اهلنا واخواننا يقول يارجال فكك من اصحاب الحراك ذي ، هادولا نصهم عويله عيال سوق وحق قات وحق سبان ولايعرفون حاجة من اللي يحصل ، فالحين بس في التكسير و حرق التواجر ، لا لبوهم صلاة ولاصوم كما الناس ، يارجال خلك منهم ذي ، ويقولوا كمان وش من قيادات معهم ذي ، قيادات نصابه همهم بس الزعامة والنصب والكذب على الناس ، قيادات مشوه تاريخها ، لاتخاف الله ولاتخاف الناس .

وفي المقابل يقوموا يحركوا لما يسمعوا خبر من صنعاء ولا من تعز ، لما يسمعوا ان الجماعة اليوم لقوا مظاهرة كبيرة وحاشدة ، تحصلهم مرة بايتقطبوا من الفرح ، كأنه حد غسلهم بماء بارد في قوة الاربعينية ، وعلى واء كله دا ، ماك مداري .

انا اقول للناس دي العيب مش في الشباب اللي حامل القضية بقلبه وحاطها في عقله ، وحتى ان لقوا شي غلط ، نحن عمرنا مابنقول للغلط صح ، لكن العيب فيكم انتم يامتعلمين ويامثقفين وياخريجي الجامعات ، قلوبنا مفتوحة لكم ولكل الناس تعالوا تقدموا الناس وقدموا رؤيتكم ، ونصحوا الشباب ، ووجهوهم وقولوا لهم وين الصح من الغلط ، قولوا لهم ان قطع الطريق غلط ، واحراق التواجر غلط ، قولوا لهم ان بعض الالفاظ اللي تقولها مو ريض منكم ، بس المهم انكم تكونوا بينهم ، تساعدوهم وتساندوهم وصدقونا والله العظيم لما تنصحوهم بصدق ويحسوا انكم معاهم وان هدفكم وهدفهم واحد ، اكيد بايسمعوا منكم ، وانتم راح يكون لكم هيبه بين الشيباب لانكم اكثر وعي واكثر معرفة ، لكن للاسف لما بقيتم منعزلين ومتفرجين وقعت بعص هذه الاخطاء ، اللي يمكن صارت بقصد او بدون قصد ، ولاتنسوا ان اخواننا الشباب في حضرموت وغيرها الى الان ماسووا خمس اللي يسوونه شباب التغيير في صنعاء ولا في تعز ولا غيرها ، اخواننا في حضرموت والجنوب عامة ماتعلموا يكذبوا في الاعلام ، ولما تخرج مسيرة ماهي حقهم مايقولوا هذه حقنا يتعمدوا الكذب في الجزيرة وسهيل وغيرها على الناس في الداخل والخارج كما يسووا شباب التغيير في حضرموت وغير حضرموت ، اخوانكم شباب الحراك في حضرموت والجنوب الى الان ماحملوا السلاح وواجهوا قوات الاحتلال بالمواجهات المسلحة ، اخوانكم في حضرموت والجنوب يعانون اشد المعاناة في الجانب المالي والخدمي ومع ذلك صامدين ، مش مثل الجماعة في صنعاء وتعز ، تعال الى الساحة ولعاد لك سيب ، قات واكل ورقص وجهز نفسك بس لما تكون مظاهرة ، وكل مظاهرة تخرج كل واحد من الف ريال او كثر ، على حسب قوة الشخص ونشاطه ،

بالله عليكم ياجماعة يا اخوانا في حضرموت والجنوب اللي عادهم متمسكين بالشماليين ، ماكفاكم اللي صار لنحن في الـ 20 سنة الماضية ، نهبوا بترولنا و عقارات الدولة ، نهبوا البحر، ذلوا نحن في كل مكان في العالم ، الوظائف احتكروها لهم ، والمناصب للشماليين بس ، اخوانا في حضرموت وغيرها يبحثوا على فرصة عمل مايحصلونها ، ويجي الشمالي من صنعاء ولا من تعز ويشتغل في بلادنا وابن البلاد مايحصل له شي شغل في بلاده ، كنا قبل الوحدة متقدمين عليهم في التعليم والصحة والثقافة والفن ومستوى الدخل ، واليوم للاسف اللي ينظر لحالنا يقول والله الشماليين متعلمين اكثر منكم .
ياجماعة فيقوا من نومكم ، وش تريدوا اكثر من اعترافهم هم بكل شي سواه في نحن ، قالوا احتلانكم ، وقالوا افتينا بقتلكم واستباحة اموالكم ، طيب اش تريدوا اكثر من كدا ، وربي العظيم ، أي واحد جنوبي فيه ذرة احساس وحب للجنوب بايقول الى هنا يكفي ، ولعبتكم انتهت يا شماليين .

إلا اذا كان في ناس منا يتمنوا 20 سنة ثانية من الذل والمهانة والسرقة والتهميش ووجع القلب ، هذا كلام آخر .