[بيان بن صادر]

تسديد الفواتير مع تسديد فوهات البنادق

جلست مع جماعة من الحراكين اشكي لهم قصة الفاتورة ... واحد من الجماعة بداء يحك راسه والثاني قطع شواربه ... ماهذا ياجماعة يعني أدفع لوحدي ولاكيف فروا عليه الجماعة وين رايحين ؟؟؟ قالوا مظاهرة في المعلا ... طيب تعالوا والفاتورة ؟؟ قالوا بعدين بعدين ياعم تعال باتجي معانا ...

هكذا هو حال أبناء عدن خاصة المواطنين والمقيمين ونحن النازحين ... توجه لهم فوهات البنادق يومياً وشهيد تلو الآخر وجريح بعد الآخر , ونحن في نفس الوقت ملتزمين بتسديد فواتير الماء والكهرباء للحكومة اليمنية التي تنهب وتسرق خيراتنا الجنوبية ...

ملتزمين ماشاء الله علينا ...... ياخواني الكهرباء تنقطع في اليوم والليلة جماع مرات ....... ماهذا ياعم علي ...

الشي العجيب أن خطيب مسجد المنصورة سمعته ذات يوم وفي نهاية الخطبة الثانية يحث مواطني المنصورة على سرعة استعجال تجميع فاتورة المسجد

قلت في نفسي مالك ياشيخ علي تطالب بتسديد الفواتير ونظام الاحتلال يسدد فوهات البنادق لصدور أبناء الجنوب المساكين

طبعاً الشيخ علي الزيدي خطيب جامع المنصورة وعضو في الهيئة الشرعية والافتاء الجنوبية

كيف هذا ياشيخ علي ؟؟؟ الحكومة تنهب وتسرق المواطن الجنوبي ؟

الحكومة اليمنية تقتل وتعتقل وتجرح وتختطف وتسدد تسديد مباشر ...... بس يمكن الشيخ علي الزيدي غير رايه الآن ........ الله اعلم نصبر ونشوف ؟


نأتي الآن عن قصتي مع الفاتورة وصاحب العمارة :

سألت صاحب العمارة اللي أنا مستأجر فيها بعد أن طال انتظاري للفاتورة القادمة من إدارة الكهرباء

كنت خايف من أجمالي الفاتورة لان الجو حار في عدن وتطلع قيمة الفاتورة مبالغ كبيرة

سألت صاحب العمارة ... كيف ياصاحبي وين الفاتورة ؟ وأنا برتعش من الفجيعة ...

قال لي .. لاتخاف لاتخاف ياعم بيان بعدين نشوف كيف ....... فرحت ورحت على طول أكلم العيال في البيت .. قالوا ياباه الرجال طيب وهو حراكي جنوبي ... قلت يالله كلنا حراكيين .

أنا قلت في نفسي أكيد الرجال مايدفع قيمة الفاتورة والله فرحت ذاك اليوم .

بعد ثلاثة أشهر الرجال صاحب العمارة يقول لي :

ياعم بيان ياعم بيان شفته ومعه بيده جماع أوراق ....... قلت في نفسي يالله يالله باين الرجال كان يضحك عليه ... كيف حراكي ... قربت عنده وأنا خائف من الخبر المزعج ..

قلت له هاه ياعم ايش فيه ؟

قال الفاتورة الفاتورة ,,, قلت له أيش من فاتورة جعلك ساحرة .

قلت له كيف ياخي انت من كلامك الاول طمنتي ونا صدقت ..

قال لالا ياعم بيان هذا واجب لابد ان ندفع الفلوس حق الحكومة مايجوز ياعم بيان حتى إذا نحن حراكيين ... قلت له حركوا راسك وانت الان حركت اماصيري من الفجيعة .

قلت له كم طلع عندي ؟

قال مائة ألف ريال ... بعدما قال لي مائة ألف طلع عندي الضغط فوق المية ...


المهم الرجال ياجماعة الخير له حوالي شهرين ماكلمني على الفلوس وأنا الآن عامل نفسي ناسي الموضوع وقلبي يحرقني من داخل كلما ذكرت قيمة الفاتورة .

الآن ياعيالي أيش الحل ؟

أسكت واتعامس وأواصل نسياني للموضوع وأجلس لي في الساحة ... ولا أروح أدفع الفاتورة للحكومة السارقة المارقة ؟؟؟

يالله مع السلامة خاطركم ياشباب أروح البيت اشوف العيال لان الكهرباء باتنطفي بعد قليل أروح اشتري لهم شمع أبو خمسين ريال .. باي باي لندن