[align=center]
الجزء الخامس)) (( 4 العصر – بيت بو خالد - المطبخ))
خلود مشغوله وساره متسنده على الثلاجه..
سارة : هااا ياخلود كم باقي على الكيكه تراني ميته من الجوع
خلود : ثواني بس .. وبعدين لا تعجليني
سارة : طيب .. اقول خلود باقي 3 اسابيع على الاختبارات النهائيه
خلود طلعت زينة الكيكه من الدولاب : ادري ما قلتي شي جديد
سارة : يعني افهمي ابيك تدرسيني رياضيات
خلود راحت عند الثلاجه : وخري شوي
وخرت سارة : هااا وش قلتي؟؟
خلود وهي تدور بالثلاجه : اوكي بس راح ابتدي معاك هذا الاسبوع لأن اختباراتي بعد اسبوعين
سارة : خلاص اجل بقول لمي عشان تدرسينا مع بعض
سكرت خلود الثلاجه وراحت تحط الكريمه والزينه على الكيكه ... قربت منها سارة
سارة : الله شكلها يجنن..
خلود :روحي جهزي الصحون والملاعق والحقيني بالصاله ...
خلود حطت الكيكه بالطاوله اللي بوسط الصاله وبدت تحط كل قطعه بصحن وملعقه ووزعتها على ام خالد وتركي وسارة وهي اخذت صحن
ام خالد وهي تاكل : يعطيك العافيه والله تعرفين تطبخين
خلود مبتسمه : عليك بالعافيه يا خالتي
تركي وفمه مليان : وش رايك نفتح لك محل للحلويات والنص بالنص
خلود : ههههههه خلاص لما اتخرج
انزلت مها وشافت الكيكه
مها : قاعدين تا كلون ولا تنادوني؟؟
قعدت مها واخذت لها قطعه وحطتها بصحن واخذت ملعقه وقعدت تاكل
مها : الله لذيييييذه ... من أي محل شريتوها ؟؟
سارة مبتسمه : من محل خلود
وقفت مها عن الاكل : وانا اقول ليش طعمها مر
رجعت مها الكيكه مع ان نفسها فيها
مها عافسه وجهها وتطالع فيهم : وشلون تاكلونها احس انها ما تنبلع!!
ام خالد : الا وش زينها من كيكه ان شاء الله اذا جا سعود بعد اشوي ابذوقه منها
خلود توترت وقالت بنفسها (( يا سلام سعود راح ياكل من ايدي ... ياربي تعجبه ))..خلص صحن سارة وراحت تجيب لها قطعه ثانيه
خلود وبدون شعور : بس ياساره راح تخلصينها وما راااح ياكل ...... خالد
سارة : خالد ما راح يجي بدري واذا جا سوي له وحده ثانيه
بعد ربع ساعه طق جرس الباب
ام خالد : مهاا قومي افتحي هذا اكيد سعود
خلود : اجل عن اذنكم أنا بطلع فوق .... واخذت الصحون والملاعق الوسخه وودتها المطبخ
مها معصبه : وليش ماتقولين لساره هي الاصغر
ام خالد : سارة قاعده تاكل يالله قومي بسرعه .. احترق سعود من الشمس
مها وهي طالعه من الصاله تتحلطم: وينها هالشغاله ليش ما تفتح الباب بس كل مها هي اللي تفتح صايره بواب لها لبيت
طلعت خلود من المطبخ وبأيدها صحن فيه ترامس الشاي والقهوه ..حطتهم على الطاوله بجنب الكيكه
خلود : خالتي تبين شي قبل لا أطلع فوق؟
ام خالد : مبتسمه : لا يا يمى ما ابي الا سلامتك
راحت خلود فوق لغرفتها...ودخل سعود بالصاله
سعود : السلام عليكم
الكل : وعليكم السلام
قامت سارة وتركي يسلمون عليه .. سعود راح باس راس امه وقعد جنبها
سعود : ها يمى وش اخبارك ؟؟
ام خالد : بخير انت شلونك وش اخبار بنتك وزوجتك؟
سعود : والله الحمد لله تمام
سارة : سعود تبي كيكه؟؟
سعود : لا مشكوره مو مشتهي
تركي : لا تفوتك والله يروح نص عمرك اذا ما اكلتها
سعود مبتسم : لهالدرجه الكيكه حلوه؟؟
مها : لا تصدقهم تراهااا مره ومالها طعم ابد
سعود : وش فيكم دوختوني حلوه ولا مو حلوه ؟؟
ام خالد تكلم مها : بدل ما تكرهينه في الكيكه قومي سوي مثلها
سعود : ههههههه افااااا يا مها هالصغيره سارة تعرف تطبخ احسن منك ؟؟ بس أنا بريحك لا تقومين ولا تسوين شي لأن من جد مو مشتهي اكل
سارة : مو أنا اللي مسويتها .. اللي مسويتها خلود
سعود سرح شوي وبدون شعور : طيب عطيني قطعه
مها : توك مو مشتهي
سعود يرقع : شوفي أنا صحيح مو مشتهي بس ما ابي اكسر خاطر امي اكيد انها تقول دخل بيتنا وما اكل شي ... سارة صبي لي قهوه
ام خالد : ما عليك منها بس هي مقهوره لان خلود بعمرها وتطبخ احسن منها
سارة وهي تمد له الكيكه : بذمتك قول رايك بصراحه عشان بعض الناس يعرفون ان الكل عجبته كيكة خلود الا هم
سعود كل اول لقمه : ياسلام بصراحه روووعه... ما دريت ان ماعندك ذوق يا مها
مها معصبه : والله انتوا اللي ماعندكم ذوق مدري وش عاجبكم في هالخلود
تركي : اهاااا يعني تعترفين ان الكيكه عاجبتك بس صاحبتها مو عاجبتك
مها وهي قااايمه : اووووووه اروح لغرفتي احسن من اني اضيع وقتي بكلام فاضي
تركي : مدري متى هالبنت بتحب خلود
سعود : باين على مها انها تكره خلود
سارة : الا ما تطيقها بعيشة الله
ام خالد : الله يهديها ان شاء الله
سعود : وخلودتكرها ولا لأ؟
تركي : بالعكس مسكينه هالخلود والله انها طيبه وحبوبه وما تكره احد
سعود : اجل الله يعينها على مها ويصبرها
سعود سرح في خلود ووجه خلود وكلام خلود وطيبة خلود وكيكة خلود
سارة : اقول سعود انت جاي تزورنا ولا تسأل عن خلود؟؟
تركي : اكيد جاي يزورنا
سارة تكلم تركي : ترا مايدري عنك ولا يدري عن اللي تقوله
تركي : هييييي يااابو الشباب
سارة : ولا هووو هنا
ام خالد دقت سعود بكوعها
سعود انتبه : هلااا
ام خالد : وش فيك وين رحت اخوانك يكلمونك وانت ماتدري عنهم!!
سعود مبتسم : لا يمى بس كنت افكر بـ
ام خالد : بخلود؟؟
سعود انقلب وجهه : ههههههههه لا يمى كنت افكر بطعم الكيكه ... سارة قولي لخلود تسلم ايدينها والله الكيكه لذيذه
ام خالد : تفكر بطعم الكيكه ؟؟ ليش ناوي تطبخ مثلها؟؟
تركي وساره : هههههههههههههه
تركي : والله يمكن يسويها بو ريناد
سارة : اقول خلونا من كيكة خلود ... ليش ما جبت رنوودي والله اشتقت لها
سعود وهو يحط الصحن على الطاوله : انشاء الله بكره بجيبها هي وعبير
ام خالد : ايه والله هذي مرتك ليش قاطعتنا ولا حتى تقول اسلم على ام زوجي
سعود : يمى اعذريها والله ريناد مطلعه روحنا...سهر بالليل ونوم بالنهار وامها صايره مثلها
سارة : يا حليلها والله ..اذا طفشتوا منها جيبها لي بنومها معي
ام خالد : خلي البنت عند اهلها وانتي خلك بدروسك
تركي يطالع بساعته : يوووه تأخرت .. يالله عن اذنكم
ام خالد : وين بتروح ؟؟
قام تركي : بروح عند الشباب..يالله مع لسلامه
ام خالد : سارة
سارة : نعم
ام خالد : قومي شيلي الصحون وديها للمطبخ
قامت سارة : ان شاء الله
سعود : يمى
ام خالد : نعم
سعود : يمى تسمحين لتهاني تزور خلود؟؟
ام خالد مستغربه : وليش امنع؟؟
سعود : مدري تهاني ودها تزورها بس خايفه من ردت فعلك
ام خالد : بالعكس حياها الله بأي وقت..
سعود : يعني انتي مو شايله عليها؟؟
ام خالد : انت عارف ان تهاني ونسرين مالهم ذنب بكل اللي صار
سعود : والله معك حق والله يسامح ابوي هو اللي مكبر السالفه
********************
(( غرفة مها))
مها تكلم نهى على التليفون
نهى : تكفين يا مها امااانه قولي له الله يخليك
مها : لا حول ولا قوة الا بالله.. اانتي مجنونه؟؟
نهى : يا بعد عمري انتي وش بتخسرين اذا قلتي له؟؟
مها : والله انك خبله تبيني اقوله يا خالد الله يخليك تزوج نهى بنت عمي؟؟
نهى : لاااا مو بهالطريقه عاااد
مها : اجل شلون؟؟
نهى : يعني قولي له .. متى نشوف عرسك؟؟ يالله نبي نشوف عيالك .. نبي نفرح فيك ..ومن هالكلام.. الله يخليك
مها : زين وبعدين
نهى : انتي اذا ازعجتيه كل يوم وقلتي له تزوج بيقول لك :خلاص اخطبي لي ازعجتيني ..عاد انتي حبيبتي راح تخطبيني له .. فهمتي الحين؟؟
مها : طيب خلاص ... الا انتي ليش مستعجله على الزواج توك صغيره؟؟
نهى : اللي يسمعك انتي وناصر مو مستعجلين؟؟
مها : أنا من ناحيتي مو مستعجله بس ناصر الله يهديه مستعجل
نهى : طيب ليش ماتخطبون وتفكونا
مها : تو الناس .. على الاقل لما اتخرج من الجامعه
نهى : يعني هامتك الجامعه الحين؟ مها محد يعرفك كثري
مها : بصراحه ماني متأكده من شعوري ناحية ناصر؟؟
نهى : شلون يعني منتي متأكده؟
مها : يعني اذا قعدت معاه وسولفت احس اني اموووت فيه بس اذا قعدت لحالي وفكرت فيه احس اني مااحبه...والله مدري شلون اشرح لك
نهى : انتي هييييي لا تقعدين تلعبين بمشاعر اخوي
مها : عشان كذا أنا أ أجل الخطبه ... وبعدين خاايفه حب ناصر لي يقل بعد الزواج
نهى : ان شاء الله ما يقل.. بس الخوف ان حبك لك يكون وهم؟؟
مها بقلق : والله مدري يا نهى أنا خايفه ومو خاايفه
نهى : احس انك بتعذبين اخوي معاك
مها عصبت : تراك ذبحتيني اخوي واخوي فكينا من هالسالفه قولي لي بكره بتروحي الجامعه؟؟
نهى خايفه من مها : لا مو رايحه بكره ابوي بيسوي عشاء التقاعد وتعرفين لازم اقعد اشوف اللي لي واللي علي
مها : عشاء رجال وحريم ولا كيف؟
نهى : لا بس رجال
مها معصبه : ومسويه نفسك بقعد البيت اللي يسمعك بتنظفين مدري بتطبخين !! المهم بكره لا تغيبين تعالي
نهى بخوف : ان شاء الله
*********************
(( بيت بو نايف))
نايف قاعد مع حنان بالصاله اللي فوق
نايف : متى راح تجي امي من المزرعه؟
حنان : والله مدري ليش تبي منها شي؟؟
نايف : لا.... بس اسأل
حنان : فيصل شخباره زرته اليوم؟؟
نايف : لا مارحت له ان شاء الله بعد بكره ازوره
حنان : تصدق اشتقت له ...
نايف : يالله باقي له شهرين ويطلع من السجن
حنان بحزن :آآآه يا فيصل ضيعت مستقبلك بايدينك.. وين فيصل اللي ما يطلع من البيت الا للضروره .. اللي يهتم بدروسه ... اللي مايعصي والدينه ..ضاع فيصل وانتهى
نايف : الله يهديه ان شاء الله ...ادعي له بالهدايه
حنان : الله يهديه
نايف : على طاري فيصل لا يكون خلود ما صارت تجي بيتنا بسبب اللي سواه هذاك اليوم ؟؟
حنان : لا لا مو عشان كذا
نايف : اجل وش عشانه ؟؟ عشان ما تشوفني أنا؟؟
حنان : والله مدري بس يمكن تكون منحرجه منك
نايف : لا تنحرج ولا شي الزواج قسمه ونصيب قولي لها تجي لبيت خالتها عااادي ولا كأن صار شي
حنان مبتسمه : افهم من كذا انك خلاص قررت تدور لك وحده غير خلود؟؟
نايف بحزن : غير خلود ؟؟ ومن هي اللي في هالدنيا كلها بتكون احسن من خلود
حنان تأثرت : نايف والله في بنات احسن من خلود بكثير لو تشوف البنات اللي بالجامعه الوان واشكال
نايف : بس قلبي مايشوف ولا يحب الا خلود
حنان فاقده الامل : الله يهديك ويرزقك بوحده تحبك وتموت فيك و تنسيك خلود
***************
(( في بيت بوسعود))
دخل سعود الصاله وشاف تهاني قاعده على التلفزيون
سعود : السلام عليكم
تهاني : هلا وعليكم السلام
قعد سعود : اجل وين عبير ؟
تهاني : فوق تنوم ريناد ..
سعود : وابوي وينه؟
تهاني : بالمجلس ما شفته؟؟
سعود بتعب : لا ما انتبهت له
تهاني : شخبار خالتي وعيالها؟
سعود : الحمد لله كلهم بخير ..وامي تسلم عليك
تهاني مستغربه : هاااا؟؟ خالتي تسلم علي أنا؟؟
سعود : ايه وش فيك ؟؟ تهاني انتي ما تعرفينها زين ..امي انسانه طيبه وقلبها ابيض.. تصدقين قلت لها انك تبين تزورين خلود قالت حياها الله بأي وقت
تهاني بفرح : صدددق ... يعني خالتي نست اللي صار ؟؟
سعود : اللي صار ماااضي واحنا اعيال اليوم
تهاني : الحمد لله لك يارب .. ودي اروح لها وابوسها على راسها ...
سعود وهو قايم : خلاص متى ما بغيتي تروحين أنا اوديك
تهاني : اوكي
طلع سعود فوق ودخل غرفته استقبلته عبير بكل حب وحنان
عبير : هلا ياعمري
سعود وهو رايح ناحية السرير: هلا
انسدح سعود على السرير وعبير واقفه مكانها مستغربه
عبير : حياتي وش فيك؟
سعود وهو مغمض عيونه : مافيني شي بس تعبان شوي
عبير : اجيب لك العشاء؟
سعود : لا لا ماله داعي
عبير : زين تبيني اجيب لك شي ؟
سعود معصب : اوووووووه يا عبير وش فيك صايره حنّانه قلت لك مابي شي ما تفهمين؟
عبير مصدومه : طيب طيب هدي نفسك ..انا برى اذا بغيت شي نادني
وعبير هي طالعه ريناد صحت من النوم وقامت تبكي
سعود : تعالي خذي بنتك هالمزعجه..ما تخلي احد يرتاح ابد
عبير اخذت ريناد واخذت رضاعتها وطلعت برى الغرفه وهي نازله تحت قابلت تهاني وهي طالعه
تهاني وهي تضحك لريناد : وش فيها رنودي مانامت؟؟
انزلت عبير من غير ماترد على تهاني وراحت وقعدت على الكنبه اللي بالصاله وعطت ريناد الرضاعه ..الحقتها تهاني وقعدت جنبها
تهاني بقلق : عبير وش فيك؟
عبير والعبره خانقتها : مافيني شي
عبير حاطه ريناد فوق رجولها ومن التوتر اللي هي فيه قاعده تهز رجلها وكل مالها تزيد في الهز
تهاني : عبير هدي شوي لا تطيح ريناد منك
عبير هدت شوي : ما لاحظتي شي على سعود
تهاني مستغربه : لا ..انتي ملاحظه عليه شي؟؟
عبير : ماتحسين انه متغير
تهاني : مو مره بس صاير يفكر ويسرح كثير
عبير : تهاني سعود صاير يعصب علي وعلى اتفه الاسباب..
تهاني تهدي عبير : ما عليه يا عبير تلقينه يمر بمشاكل وضغط بالشركه انتي عارفه ان الشغل كل على راسه
عبير انزلت دمعه من عيونها وطالعت بتهاني : يعني تتوقعين الشركه هي السبب؟؟
تهاني مبتسمه : ايه .. انتي عطيه وقت وصدقيني اول ماتخلص مشاكله راح يرجع مثل اول
عبير بامل : الله يسمع منك ان شاء الله
تهاني : الليله بنوم رنودي عندي عشان سعود ينام ويرتاح
عبير : ايه والله ريناد كل ليله تصيح وما تخليه ينام
تهاني مبتسمه : خلاص أنا با خذها وانومها معي وانتي انتبهي لزوجك اوكي
عبير ابتسمت : مشكوره يا تهاني
تهاني : ايه ابتسمي الزعل مو راكب عليك ... [/align]
__________________
استخــــــدام اسلوب الشتم والقدح بالفاظ بذيئة تدل على إفـــــــلاسك في الحديث
انت تعرض صورة واضحـــة على شخصيتك النضـــاليةالتحررية اثناء حوارك
فالنســـاء تتكلم ثم تتنتقي الالفـــاظ بينما الرجال تنتقي الالفـــاظ ثم تتكلم
|